تو ہے تاجر تجھے تبلیغ سے کیا رشتہ ہے؟

مجالسِ امام حسین علیہ السلام میں منبر پرآنے والے رنگ برنگے ذاکروں اور خطیبوں اور ان کی طرف سے پڑھی جانے والی مجالس کی موجودہ صورت حال کو دیکھ کر دل خون کے آنسو روتا ہے۔ ایسے ہی جاہل مقررین کو مخاطب کرتی ہوئی خونِ دل سے لکھی گئی ایک نظم:

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

تو ہے تاجر تجھے تبلیغ سے کیا رشتہ ہے

تُو نے اس ذکر کی عظمت کو کہاں سمجھا ہے

چند سکوں کے عوض دین کو بیچا تو نے

ذکر سید کو بنایا ہے تماشا تو نے

اشکِ بیمار کو بازار میں بیچا تو نے

غم سجاد کو بے کار میں بیچا تو نے

چادر ِحضرت زینبؑ کی لگائی بولی

تو نے پوشاک سکینہؑ کی بھی زَر میں تولی

علی اکبرؑ کی جوانی کو بھی نیلام کیا

علی اصغرؑ کے تبسم کا بھی اک دام لیا

تو نے تو شامِ غریباں کا سماں بھی بیچا

اور سلگتے ہوئے خیموں کا دھواں بھی بیچا

لاشۂ قاسمِ پامال کے ٹکڑے بیچے

فاطمہ زہراؑ کے رومال کے ٹکڑے بیچے

تو نے عباسؑ کے کاٹے ہوئے بازو بیچے

پنجۂ شمر میں شبیرؑ کے گیسو بیچے

کربلا والے اسیروں کا پسینہ بیچا

چھلنی چھلنی مرے سجاد کا سینہ بیچا

تو نے اصحابِ حسینیؑ کی فضیلت بیچی

جَون کا عشق بِکا، حرؑ کی بصیرت بیچی

فِیس اتنی ہے کہ مومن کا لہو چوسا ہے

شمر بھی شدت حیرت سے تجھے تکتا ہے

۔۔۔

تو نے آیات کو بچوں کا کھلونا سمجھا

اور احادیث پہ اپنا ہی اجارہ سمجھا

ترے خود ساختہ الفاظ کی تعبیر غلط

تری آیات غلط اور تری تفسیر غلط

علم کیا چیز ہے؟ دانش کی فضیلت کیا ہے؟

تجھے معلوم کہاں، نورِ ہدایت کیا ہے؟

عالم و علم سے دوری تجھے میراث ملی

گویا صدیوں کی جہالت تری گھٹی میں پڑی

۔۔۔

ذکرِ شبیرؑ محبت کا سبق دیتا ہے

تو مسلمان سے نفرت کا سبق دیتا ہے

ترا ہر حرف ہے خنجر، ترا ہر لفظ سناں

آگ برسانے میں مصروف رہے تیری زباں

اپنےالفاظ کے نیزوں کی اَنی سے تو نے

دور لوگوں کو کیا آلِ نبیؐ سے تو نے

۔۔۔

تو نے کیا قاتلِ شبیرؑ سے نفرت کرنی؟

ظلم ڈھاتے ہوئے ظالم سے بغاوت کرنی؟

خونِ شبیرؑ کے چھینٹے ترے ملبوس پہ ہیں

داغ عابدؑ کے لہو کے ترے ملبوس پہ ہیں

۔۔۔

ساز و آواز کا بازار لگا رکھا ہے

تو نے اس قوم کو گانوں پہ نچا رکھا ہے

ایسے سُر تو نے قصیدوں میں لگا رکھے ہیں

تجھ سے آ آ کے گویّے بھی سبق لیتے ہیں

۔۔۔

مجلسِ شاہؑ میں قرآن سناتے، اے کاش!

آل عمرانؑ کا کردار بتاتے، اے کاش!

سجدۂ حضرتِ شبیرؑسکھاتے، اے کاش!

جرأتِ زینبؑ و سجادؑ دکھاتے، اے کاش!

تو نے نعروں کے لیے حق کا بیاں چھوڑ دیا

داد کا شور بڑھا، ذکرِ اذاں چھوڑ دیا

۔۔۔

ایسے حالات میں ثاقبؔ یہ مداوا کیجے

ان جہالت کے خداؤں پہ تبرا کیجے

۔۔۔۔۔۔۔۔۔۔۔۔۔۔۔۔۔۔۔۔۔

[عباس ثاقبؔ]

موضوعات مرتبط: نظمیں